حبيبنا يا زعيم

[هاكونا ماطاطا]

نظرا لأن النعمة فاقت حدها
ولأننا مش قدها
ولأن فعلا إنجازاتك فوق طاقتنا
ولأننا غرقنا في جمايل مستحيل حنردها

نستحلفك ...... نسترحمك ...... نستعطفك ........ نستكرمك
ترحمنا من طلعة جنابك حبتين
عايزين نجرب خلقة تانيه ولو يومين

إسمع بقى
إحنا زهقنا من النعيم
ونفسنا في يومين شقا
عايزين نجرب الاضطهاد
ونعوم ونغرق في الفساد
بيني وبينك حضرتك دا شعب فقري مايستحقش جنتك
أنا عارفه شعب مينفعوش إلا شارون وبلير وبوش
عايز يجرب الامتهان ويعيش عميل للأمريكان
بيمد غازه لإسرائيل ويومين كمان ويمد نيل
أهو يعني نشرب ميه واحده
ندوب في بعض

ماء وماء وماء ونفض سيرة الانتماء
وبلاها نعرة وطنطنة تبقى البلاد مستوطنة
متسلطنة بالسرطنة
إيه اللي خدناه مالكرامة والإباء
حبة خطب وكلام كلام
إحنا راهننا على النظام
ورضينا بخيار السلام
بخيار حنسد عين الشمس بيه
علشان ميطلعش النهار
ويطلع لمين ؟
حبة معارضة مغرضين ؟
وحسب بيان السلطة شلة مأجورين
يا عم فضك سيرة وارضى بقسمتك
دا شعب مش فاهم اكيد يلا اطرده من رحمتك

وان كنت غاوي الحكم خليك مطرحك
حغطس واقب واعود بشعب يريحك
راضي وعمره مايجرحك
أخرس ومايسمعش ....... واعميلك عنيه
مش كل قرش يبص فيه
مايقولش لأه وفين وليه
يضرب ينفض في السليم
وعلى الصراط المستقيم
كل اللي يعرف ينطقه عاش الزعيم يحيا الزعيم


احمد فؤاد نجم